Glimt frå historia:

Langvin var prestegard i Innvik sokn frå middelalderen. Det monumentale og verneverdige gamle prestegardshuset, sett opp etter at den gamle herresalen brann ned i 1759, var embetsbustad for presten fram til 1962.

I 1962 vart ny embetsbustad sett opp i Innvik sentrum. Etter dette vart prestegardshuset brukt som hybelbygg, internat og bustadhus for jordbruksskulen som vart oppretta på Langvin ca 1950. Skulen var i drift fram til 1995.

Prestegarden vart renovert i 1998/99, og er nyinnreidd i tidlaus stil, med bustadpreg. Opninga i september 1999 vart markert med ei utstilling av kyrkjekunst og gamle høgtidsklede. Utstillinga sto oppe til september 2000. Oktober 2000 vart Galleri Langvin etablert, med opningsutstilling av maleri, grafikk og ikoner. I 2. etasje er utstilt ei unik portrettsamling frå 1600-, 1700- og 1800-talet, på utlån frå Innvik kyrkje.

Fleire kjende personar er knytta til Innvik gamle prestegard. Den illgjetne Jon Mogenson Skanke med tilnamnet "Meister-Jo" var prest her frå 1597 til 1617. Han vart avretta i 1618. Av seinare kjende namn er Johan Sebastian Welhaven, som var gjest her hos onkelen, den dugande og omtykte presten Johan S. Cammermeyer. Professor Johs. Andenæs voks opp i prestegarden, som ein av dei 8 sønene til presten Mads O. Andenæs.